சென்னை: தமிழ்நாடு அரசின் 2022ஆம் ஆண்டிற்கான வேளாண்மை பட்ஜெட் அறிக்கை இன்று (மார்ச் 19) தாக்கல் செய்யப்பட்ட நிலையில், கால்நடை பராமரிப்பு திட்டங்களுக்காக மாநில அரசின் நிதியிலிருந்து ரூ.42 லட்சம் ஒதுக்கீடு செய்யப்பட்டுள்ளதாகவும், திட்டங்களைச் செயல்படுத்த உள்ளதாகவும் தெரிவிக்கப்பட்டுள்ளது. கால்நடை பராமரிப்பு பணிகளுக்கான திட்டங்கள் பற்றிக் குறிப்பிடப்பட்டுள்ளது.
அதில், “உழைக்கும் எருதுகளும், பால் தரும் பசுக்களும், எரு சேர்க்கும் ஆடுகளும், பணம் தரும் செம்மறிகளும், வளம் தரும் கோழிகளும் உழவர்களுக்குக் காப்பீடாக இருக்கின்றன. மழை பொய்க்கும்போது கால்நடைகளே கைகொடுக்கின்றன. இயற்கை வேளாண்மை மக்களிடையே மீண்டும்வேர் பிடிக்கத் தொடங்கியிருக்கும் இச்சூழலில் கால்நடைகள் மிகுந்த முக்கியத்துவம் பெறுகின்றன.
உழவர்கள் பண்ணைக் குட்டைகளில் வளர்க்கவும், கொட்டில்களில் ஆடு வளர்க்கவும், கொட்டகைகளில் மாடு வளர்க்கவும், புழக்கடைகளில் கோழி வார்க்கவும் முற்பட்டால்தான் அவர்களது வருமானம் அதிகரிக்கும். அதற்கென்று பல்வேறு திட்டங்கள் செயல்படுத்தப்படுகின்றன. இத்திட்டங்கள் கலைஞரின் அனைத்துக் கிராம ஒருங்கிணைந்த வேளாண் வளர்ச்சித் திட்டத்துடன் இணைந்து செயல்படுத்தப்படும் என அறிவிக்கப்பட்டுள்ளது.
ஒருங்கிணைந்த பசுந்தீவனஇயக்கம்
மேலும் பால் உற்பத்தியைப் பெருக்குவதற்கான திட்டத்தில், கால்நடைகளின் உற்பத்தித்திறன் குறைவாக இருப்பதற்கு முதன்மைக் காரணம் தீவனப் பற்றாக்குறை ஆகும். மாநிலத்தின் பசுந்தீவனப் பற்றாக்குறை சுமார் 240 லட்சம் மெட்ரிக் டன் எனக் கணக்கிடப்பட்டுள்ளது. இதனைக் கருத்தில் கொண்டு, ஒருங்கிணைந்த பசுந்தீவன இயக்கம் செயல்படுத்தப்படும்.
இதன் கீழ், கிராமப்புறங்களில் உள்ள உற்பத்தியாளர்கள் தொழில் முனைவோர்களாக மாறி. வணிக ரீதியாகப் பசுந்தீவன உற்பத்தியை மேற்கொள்வதை ஊக்குவிக்கும் பொருட்டு. ஆண்டுக்கு மூன்றாயிரம் மெட்ரிக் டன்னுக்கும் அதிகமாக "ஊறுகாய் புல்' உற்பத்தி செய்யும் அமைப்பை நிறுவுவதற்கு 2022-23 ஆம் ஆண்டில் அமைப்பு ஒன்றுக்கு 10 லட்சத்து 50 ஆயிரம் ரூபாய் பின்னேற்பு மானியமாக வழங்கப்படும்.
இதற்கென ரூ.42 இலட்சம் மாநில நிதியிலிருந்து ஒதுக்கப்படும். பழத் தோட்டங்களில் ஊடுபயிர் முறையில் தீவனப் பயிர்கள் சாகுபடி மேற்கொள்வதை ஊக்குவிக்கும் பொருட்டு 2022-23 ஆம் 60 இலட்சம் ரூபாய் நிதி ஒதுக்கப்படும். இரண்டாயிரம் ஏக்கரில் பசுந்தீவனம் உற்பத்தி செய்வதற்கும் ஏற்பாடுகள் செய்யப்படும்” எனத் தெரிவிக்கப்பட்டது.
இதையும் படிங்க:வேளாண் பட்ஜெட் 2022- மீன்வள மேம்பாட்டு திட்டங்கள்!
